Kristinn Sigmundsson leikstýrir óperudeild Söngskóla Sigurðar Demetz

18 maí Kristinn Sigmundsson leikstýrir óperudeild Söngskóla Sigurðar Demetz

Óperudeild Söngskóla Sigurðar Demetz mun bætast mikill liðstyrkur næsta vetur þegar Kristinn Sigmundsson bætist í kennaralið skólans. Hann mun leiðbeina í óperudeild og leikstýra óperuverkefni deildarinnar í lok mars 2019.

Þetta er í fyrsta sinn sem Kristinn leikstýrir og segist hann hlakka mikið til að takast á við þessa áskorun. Kristinn hefur verið einstaklega farsæll söngvari og er einn af okkar reyndustu og víðförlustu óperusöngvurum. Það er skólanum gríðarlegur fengur að fá hann til samstarfs.  Hann fylgir í kjöfar annars bassasöngvara sem leikstýrt hefur sýningum skólans síðustu ár, Bjarna Thors Kristinssonar og mun á sama hátt og með sinni víðtæku reynslu geta kynnt nemendum skólans þá strauma og stefnur sem óperuheimurinn hverfist í á 21. öldinni.

Kristinn þarf varla að kynna en hann hefur á síðustu áratugum sungið m.a. í Vínaróperunni, Metropolitan óperunni í New York, La Scala í Mílanó, The Royal Albert Hall, og Covent Garden á Englandi, auk óperuhúsanna í Amsterdam, Barcelona, Berlín, Dresden, Düsseldorf, Genf, Köln, Flórens, París, San Francisco og Detroit.

Við hlökkum til að taka á móti Kristni í haust og væntum mikils af samstarfinu.