Almennar upplýsingar

Upplýsingar frá skrifstofu

Forföll

Falli kennsla niður vegna veikinda kennara eða nemanda er ekki skylda að bæta upp tíma. Falli tími niður af öðrum orsökum er kennsluuppbót samningsatriði fyrrgreindra aðila.

Greiðslukjör

Greiðsla skólagjalda skiptist á fjóra gjalddaga, 1. október,1. desember,1. febrúar og 1. apríl. Eindagi er 15 dögum síðar. Ógreidd gjöld eiga á hættu að vera send til innheimtu til Inkasso. Semja ber um greiðslur og borga staðfestingargjald áður en kennsla hefst. Staðfestingargjald er óafturkræft.

Nemendur sem hyggjast hætta námi á meðan á skólaári stendur skulu tilkynna það til skrifstofu skólans og semja þar um greiðslur skólagjalda í samræmi við námstímann.

Nemendur sem stunda grunnstigsnám í Söngskóla Sigurðar Demetz þurfa að semja við sitt sveitarfélag ef þeir eru búsettir utan Reykjavíkur, um greiðslu kennslukostnaðar. Greiðlsa kennslukostnaðar á grunnstigi í söng er á ábyrgð sveitarfélaga en skólagjöld skólans eru til að mæta kostnaði við rekstur hans.

Nemendur sem hætta námi á miðju skólaári

Nemendur sem taka þá ákvörðun að hætta námi eftir að skólaárfið er hafið verða að gera ráð fyrir að greiða skólanum 3 mánuði af skólagjöldum eftir að námi er hætt (skólaárið skiptist í 9 mánuði). Athygli skal vakin á því að skólinn ber fjárhagslega ábyrgð gagnvart kennurum í 3 mánuði eftir að nemandi hættir námi og greiðir honum laun í þann tíma ef nýr nemandi innritar sig ekki í skólann fyrir þann sem hættir. Einnig ber skólinn aðrar rekstrarlegar skuldbindingar sem verður að mæta.

Veikindi nemenda og kennara

Eins og þekkt er í öðru skólastarfi ber kennara ekki skylda til að bæta nemendum upp söngtíma á veikindatíma sínum nema um sé að ræða lengri tímabil. Þá sér skólinn nemendum fyrir öðrum kennara í samráði við nemandann.

Verði nemandi veikur eða kjósi hann að sleppa mætingu í söngtíma,  ber kennara ekki skylda til að bæta upp þá töpuðu söngtíma.

Sótt um inngöngu í skólann

Áður en sótt eru um inngöngu í skólann skal umsækjandi skrá sig gegnum Rafræna Reykjavík. Nánari upplýsingar fást í síma 552-0600 eða 893-7914 . Að því búnu er sótt um á heimasíðu skólans eða símleiðis. Umsækjandi þarf að leggja til allar upplýsingar sem beðið er um á umsóknareyðublaði þessarar síðu.

Upplýsingar um áfangapróf

Allar almennar upplýsingar um áfangapróf í söng er að finna á heimasíðu Prófanefndar. Sérstakt prófgjald er tekið fyrir áfangapróf og er það ekki innifalið í skólagjöldum.

Nemendafélag SSD

Markmið Nemendafélags Söngskóla Sigurðar Demetz er að efla góðan anda meðal nemenda og gæta hagsmuna þeirra innan skólans. Til að efna það háleita markmið ætlar félagið að standa fyrir ýmsum viðburðum, kynna þau mál sem eru efst á baugi í skólanum hverju sinni og vekja athygli á viðburðum sem tengjast sönglistinni.

Nemendafélagið skal starfa sem talsmaður nemenda og beita sér fyrir umbótum ef þess þarf í góðu samstarfi við stjórnendur skólans.

Yfirstandandi skólaár er senn á enda og miklar annir í lok eins og gefur að skilja. Dagskráin næstu vikur er því ekki þétt en stefnt er að því að halda einhverskonar lokahóf/ársfögnuður í lok skólaársins. Fundur verður haldinn í á næstunni til að ákveða framkvæmd þessa fagnaðar.

Netfang nemendafélagsins er nemendafelag@songskoli.is

Vinafélag SSD

Tilgangur Vinafélagsins er að styðja á ýmsan hátt við Söngskóla Sigurðar Demetz, en ekki síður að heiðra minningu Sigurðar Demetz sem var fyrsti verndari skólans. Verður það gert með ýmsum viðburðum s.s. tónleikum og fl. sem félagið mun stuðla að í samstarfi við skólann.

Allir geta verið  í vinafélagi Söngskóla Sigurðar Demetz og stuðla með því að eflingu söngmenntunar og viðburða skólans.  Árgjald í vinafélaginu er kr. 5.000 fyrir einstaklinga og kr. 6.000 fyrir hjón/pör.  Námsmenn greiða hálft gjald.  Meðlimir Vinafélagsins fá ókeypis aðgang að viðburðum þess.

Rafræn Reykjavík

Nemendur sem hyggja á nám í Söngskóla Sigurðar Demetz þurfa að sækja um nám á heimasíðu skólans en einnig er nauðsynlegt að skrá sig í námið á Rafrænni Reykjavík.

Jafnréttisáætlun SSD

Í mannréttindarstefnu Reykjavíkurborgar eru mannréttindaákvæði stjórnarskrárinnar lagðar til grundvallar og er hún byggð á jafnréttisreglunni og miðar að því að allar manneskjur fái notið mannréttinda.

Mannréttindi eru varin í stjórnarskrá Íslands. Mannréttindarstefnan er byggð á lögum um jafnan rétt kvenna og karla.

Söngskóli  Sigurðar Demetz skuldbindur sig til að vinna að mannréttindum á grundvelli jafnræðis, mannréttinda og góðrar samvinnu við nemendur skólans og kennara, og gegna þannig lykilhlutverki í að skapa vellíðan og öryggi þeirra sem skólinn veitir atvinnu og þjónustu.

Óheimilt er að mismuna fólki vegna kyns og framlag hvers og eins skal metið að verðleikum.

Konur og karlar skulu njóta sambærilegra kjara og réttinda.

Stjórnendur og starfsmenn Söngskóla Sigurðar Demetz bera ábyrgð á að tryggja að mannréttindi allra í skólanum séu virt enda beri stjórnendur ábyrgð á að:

Söngskóli Sigurðar Demetz mun sjá til þess að jafnréttisstefnunni sé fylgt eftir og standa vörð um að nemendum, kennurum og stjórnendum skólans sé á engan hátt mismunað.

Að auki mun skólinn, í samræmi við 22. gr. laga um jafna stöðu og jafnan rétt kvenna og karla nr. 10/2008, gera sérstakar ráðstafanir til að koma í veg fyrir að nemendur verði fyrir kynbundinni eða kynferðislegri áreitni í skólanum.

Þá mun skólinn fræða nemendur sína um kynferðislega áreitni og kynbundið ofbeldi,

Starfsfólk skal læra að þekkja einkenni kynferðislegrar áreitni og kynbundins ofbeldis, og hvernig ber að bregðast við grun eða vissu um slíkt meðal nemenda skólans.

Nemendum skal ætíð vera ljóst hver réttur þeirra er og hvert þeir geta leitað innan og utan skólans komi slíkt upp.

Skólinn setur sér það takmark ár hvert að kynna janfnréttisáætlun sína og sjái til þess að henni sé fylgt í öllu. Stefnan skal kynnt öllu starfsfólki að hausti og vera sýnileg á heimasíðu skólans.

Skólinn setur sér það takmark ár hvert að kynna janfnréttisáætlun sína og sjái til þess að henni sé fylgt í öllu. Stefnan skal kynnt öllu starfsfólki að hausti og vera sýnileg á heimasíðu skólans.

Skólastjórar Söngskóla Sigurðar Demetz  bera ábyrgð á að Mannréttindastefnunni sé framfylgt innan vébanda skólans.

Jafnréttisáætlun Söngskóla Sigurðar Demetz gildir frá skólasetningu 26. ágúst 2015 til skólasetningar 25. ágúst 2016, og er staðfesting á því að skólinn vinni eftir lögum nr. 10/2008 um jafna stöðu og jafnan rétt kvenna og karla.

Viðbragðsáætlun við einelti, kynbundinni og kynferðislegri áreitni og ofbeldi

Einelti, kynbundin og kynferðisleg áreitni og ofbeldi (hér á eftir nefnd brot) er með öllu óheimil af hálfu starfsfólks og nemenda Söngskóla Sigurðar Demetz (SSD) Öll slík brot eru með öllu bönnuð í allri starfsemi skólans. Einelti, áreitni og ofbeldi verður hvorki þaggað niður né umborið undir neinum kringumstæðum.

Markmið

Markmið þessarar áætlunar er að tryggja að úrræði séu til staðar fyrir aðila sem telja sig hafa orðið fyrir því að á þeim sé brotið.

Tilgreind brot eru aldrei liðin í samskiptum starfsfólks og nemenda, meðal starfsfólks eða nemenda innbyrðis, né heldur í samskiptum starfsmanna eða nemenda SSD við einstaklinga utan skólans eigi samskiptin sér stað í tengslum við starfsemi SSD.

Skilgreiningar

Kynbundin áreitni er hegðun sem tengist kyni eða kyngervi þess sem fyrir henni verður, er í óþökk viðkomandi og hefur þann tilgang eða þau áhrif að misbjóða virðingu viðkomandi og skapa aðstæður sem eru ógnandi, fjandsamlegar, niðurlægjandi, auðmýkjandi eða móðgandi fyrir viðkomandi.

Kynferðisleg áreitni er hvers kyns kynferðisleg hegðun sem er í óþökk þess sem fyrir henni verður og hefur þann tilgang eða þau áhrif að misbjóða virðingu viðkomandi, einkum þegar hegðunin leiðir til ógnandi, fjandsamlegra, niðurlægjandi, auðmýkjandi eða móðgandi aðstæðna. Hegðunin getur verið orðbundin, táknræn, stafræn og/eða líkamleg.

Kynbundið ofbeldi er ofbeldi á grundvelli kynferðis sem leiðir til, eða gæti leitt til, líkamlegs, kynferðislegs eða sálræns skaða eða þjáninga þolenda. Einnig teljast hótanir um slíkt ofbeldi, þvingun eða handahófskennd svipting frelsis á grundvelli kynferðis, bæði í einkalífi og á opinberum vettvangi, til kynbundins ofbeldis.

Kynferðislegt ofbeldi er brot sem lýst er refsivert í XXII. kafla almennra hegningarlaga nr. 19/1940.

Viðbragðsteymi

Skólastjóri skipar aðila í teymi og getur óskað eftir upplýsingum komi upp málefni tengd áður nefndum brotum.

Við skipan skal leitast við að hafa jöfn kynjahlutföll.  Komi upp vafi á hæfi nefndarmanna í málum skal viðkomandi aðili víkja sæti og annar skipaður í hans stað. Farið skal eftir reglum stjórnsýslulaga varðandi hæfi. Aðilum teymisins er skylt að gæta trúnaðar um öll mál sem til þess berast.

Í viðbragðsteymi sitja einn kennari skólans, skólastjóri, einn fulltrúi skólastjórnar og einn utanaðkomandi sérfræðingur sem hefur þekkingu og reynslu af meðferð slíkra mála. Tilkynnt er um mál til skólastjóra eða trúnaðarmanna.

Tilkynningar

Telji einhver að brotið hafi verið á sér af hálfu starfsmanns eða nemanda SSD, er viðkomandi eindregið hvattur til að snúa sér með tilkynningu um brot til fyrrgreinds aðila.

Hafi starfsmaður eða nemandi innan SSD rökstuddan grun eða vitneskju um brot á öðrum einstaklingi af hálfu starfsmanns eða nemanda SSD, skal viðkomandi snúa sér með tilkynningu um brot til fyrrgreinds aðila.

Málsmeðferð

Teymið skal rannsaka mál sem til þess berast, gæta jafnræðis og meðalhófs og skila af sér niðurstöðu svo fljótt sem verða má. Þær aðgerðir sem gripið er til í ferli máls eru í samráði við þann aðila sem brotið er gegn skv. tilkynningu.

Viðbragðsteymið tekur við tilkynningum um brot af hálfu starfsfólks eða nemenda SSD, rannsakar brot og leggur til aðgerðir eftir því sem við á.

Við tilkynningu skal teymið bjóða þeim sem tilkynnir brotið á fund teymisins. Berist tilkynning frá öðrum aðila en þeim sem brotið er gegn skal teymið bjóða þeim aðila sem talið er að brotið var gegn á fund og kanna afstöðu þess aðila til tilkynningarinnar.

Sá sem brotaþoli hefur tilgreint sem geranda málsins skal kallaður á fund teymisins og afstaða hans könnuð. Skal viðkomandi sérstaklega gerð grein fyrir rétti sínum til að andmæla framkomnum ásökunum og gefinn kostur á að koma sínum sjónarmiðum á framfæri.

Viðbragðsteymið tekur upplýsta ákvörðun með hliðsjón af framkomnum upplýsingum um hvort að málið verði tekið til formlegrar meðferðar. Ef rökstuddur grunur er fyrir hendi um að refsivert brot hafi verið framið skal teymið, í samráði við brotaþola, vísa slíkum málum til lögreglu. Ef ákveðið er að vísa máli til lögreglu skal teymið upplýsa mannauðsstjóra um málið.

Verði málið tekið til formlegrar meðferðar hjá teyminu skal stjórnanda viðkomandi deildar/sviðs tilkynnt um ákvörðun teymisins og skulu þeir grípa til ráðstafana varðandi náms- eða starfstilhögun þeirra sem að málinu koma. Óheimilt er að flytja þann aðila sem telst þolandi málsins til í námi/starfi nema viðkomandi óski þess.

Til formlegrar meðferðar telst að málið sé kannað til hlítar með samtölum við alla aðila þess, samstarfsfólk, samnemendur og/eða aðra sem til málsins þekkja að einhverju leyti. Viðbragðsteymið skal eiga óheftan aðgang að gögnum sem tilkynninguna varða. Þeim sem talið er að brotið sé gegn skal boðin aðstoð meðferðaraðila með sérþekkingu á umræddum brotum. Vilji brotaþoli kæra málið til lögreglu skal teymið vera til aðstoðar við það eins og við verður komið. Ef brotaþoli ákveður á einhverju stigi málsins að kæra það til lögreglu, skal teymið ekki aðhafast frekar í málinu.

Telji teymið að um brot hafi verið að ræða skal það leggja fram tillögu að viðbrögðum til viðkomandi stjórnanda viðkomandi deildar/sviðs og skólastjóra sem skulu taka ákvarðanir um frekari aðgerðir í málinu. Ákvarðanir um frekari aðgerðir í framhaldi af tillögum teymisins skulu teknar í samræmi þau lög og reglur sem gilda um starfsemi SSD. Skólastjóri SSD skal halda teyminu upplýstu um þær aðgerðir sem framkvæmdar eru. Öll gögn sem unnin eru í málinu skulu varðveitt af skólastjórnendum og gæta skal fyllsta trúnaðar gagnvart aðilum málsins.

Viðurlög

Viðurlög við brotum kunna að vera:

• Áminning
• Tímabundin brottvikning verði ekki brugðist við áminningu
• Varanleg brottvikning verði ekki brugðist við áminningu
• Fyrirvaralaus tímabundin eða varanleg brottvikning

Viðbrögð við brotum eru ákveðin af skólastjórnendum í samráði við skólastjórn ásamt stjórnenda viðkomandi deildar/sviðs sem heimild hafa til að veita nemanda/starfsmanni áminningu eða víkja úr námi eða starfi.

Hlekkur á síðu VelVirk um EKKO – Einelti, kynferðisleg-, kynbundin áreitni eða ofbeldi

https://www.velvirk.is/is/vellidan-i-vinnu/ekko-kynferdisleg-areitni/einelti-og-areitni

Guðbjörg Sigurjónsdóttir og Gunnar Guðbjörnsson, skólastjórar Söngskóla Sigurðar Demetz.