Höfðingleg gjöf frá Vinafélagi Söngskóla Sigurðar Demetz

15 jún Höfðingleg gjöf frá Vinafélagi Söngskóla Sigurðar Demetz

Vinafélag Söngskóla Sigurðar Demetz hefur stutt skólann um 300.000 kr. til að standa straum að kostnaði við sýningarnar tvær sem sýndar voru í vor, söngleikinn 9 to 5 og óperuna Gianni Schicchi.

Við erum afar þakklát fyrir stuðninginn og það er óhætt að segja að það munar um minna þegar ráðist er í önnur eins stórvirki sýningarnar báðar voru. Að sjálfsögðu er reynt að finna leiðir til að lækka kostða við sýningar en okkar mat á mikilvægi þess að þær endurspegli atvinnumennsku í söngleikja- eða óperufaginu kallar á ýmsa kostnaðarliði.

Alls voru fjórar sýningar á söngleiknum 9 to 5 á sal Fjölbrautarskólans við Ármúla en Gianni Schicchi var sýnd tvisvar í Tjarnarbíói en auk þess var ferðast með sýninguna til Akraness, á Flúðir og til Reykjanesbæjar.   Við erum þakklát Fjölbrautarskólanum fyrir þetta góða boð en þar sýndum við okkur að kostnaðarlausu. Samstarf skólanna hefst fyrir alvöru í haust og væntum við mikils af því.

Vinafélag Söngskóla Sigurðar Demetz var stofnað haustið 2015 en það veitir skólanum stuðning og heiðrar minningu Sigurðar sem skólinn er nefndur eftir. Á heimasíðu okkar má lesa um merkilegt lífshlaup hans.

Félagið er með síðu á Facebook þar sem hægt er að fylgjast með starfseminni.

Við ítrekum þakkir okkar til félagsins og hvetjum alla núverandi og fyrrverandi nemendur til að gerast félagar sem og fólk sem tengist skólanum á annan hátt og/eða vill halda minningu Sigurðar Demetz á lofti.