Rausnarleg hljóðfæragjöf til Söngskóla Sigurðar Demetz

05 nóv Rausnarleg hljóðfæragjöf til Söngskóla Sigurðar Demetz

Í haust bættum við í Söngskóla Sigurðar Demetz við einni kennslustofu á 2. hæð Ármúla 44 en á sama tíma og stofan var tekin í notkun barst skólanum rausnarleg gjöf frá aðstendendum hjónanna Guðmundar Jónssonar, píanóleikara og Ingibjargar Þorbergs, tónskálds.

Í dag barst okkur bréf frá fjölskyldunni þar sem merk saga hljóðfærisisins er sögð.

Við undirrituð gefum Söngskóla Sigurðar Demetz hér með flygil sem var áður í eigu föður okkar, Guðmundar Jónssonar píanóleikara.

Flygillinn er af tegundinni Petrof, framleiddur í fyrrum Tékkóslóvakíu, árið 1946. Hann var keyptur af Jóni Guðmundssyni verslunarstjóra í Zimsen, á seinni hluta fimmta áratugarins. Jón keypti flygilinn handa syni sínum, Guðmundi Jónssyni, sem þá var að ljúka námi í píanóleik frá Tónlistarháskólanum í París.

Jón var sjálfur áhugamaður um tónlist og mikill söngmaður. Hann söng með karlakór KFUM og seinna Fóstbræðrum og syngur einsöng í laginu „Um sumardag“ sem Ríkisútvarpið, Rás 1 spilar alltaf sem síðasta lag fyrir fréttir á sumardaginn fyrsta.

Guðmundur hélt nokkra tónleika og vann lengi á tónlistardeild Ríkistútvarpsins þar sem hann sinnti meðal annars þáttagerð og tónlistarvali en lék einnig undir hjá mörgum einsöngvurum í upptökum útvarpsins. Hann kenndi svo í mörg ár píanóleik í Tónlistarskóla Kópavogs.

Einnig má nefna að seinni eiginkona Guðmundar, söngkonan og lagasmiðurinn Ingibjörg Þorbergs nýtti sér líka flygilinn til lagasmíða sinna.

Okkur systkinunum er sönn ánægja að gefa Söngskólanum þennan flygil í þeirri von að hann gagnist í starfi skólans og við þjálfun efnilegra og upprennandi tónlistarmanna.

Auður Eir Guðmundsdóttir

Guðmundur Kristinn Guðmundsson

Helga Kristín Guðmundsdóttir

Þórdís Guðmundsdóttir

Við hér í SSD erum snortin yfir þessari höfðinglegu gjöf og sendum aðstandendum þessara merku hjóna okkar innilegustu þakklætiskveðjur. Hljóðfærið mun sannarlega koma að góðum notum og verður notað við menntun ungra söngnema um ókomna tíð.