Söngskóli Sigurðar Demetz | Söngleikjadeild
15806
page-template,page-template-full_width,page-template-full_width-php,page,page-id-15806,ajax_fade,page_not_loaded,,qode-child-theme-ver-1.0.0,qode-theme-ver-9.1.3,wpb-js-composer js-comp-ver-4.11.1,vc_responsive
 

Söngleikjadeild

Veturinn 2016-2017

Kennarar
Valgerður Guðnadóttir
Þór Breiðfjörð

Píanóleikarar
Ingvar Alfreðsson
Helga Laufey Finnbogadóttir

Námslýsing

Söngleikir innihalda vinsælar tónlistarstefnur í yfir hundrað ár og koma því víða við í söngstíl. Söngleikjadeildin siglir nú inn í sitt fjórða starfsár og nýtur mikilla vinsælda. Söngleikjalistin er sérstakt listform. Hún skilgreinist sem „sú sviðslist sem gerir öllum sviðslistum jafnt undir höfði“ og er þannig brú á milli listforma. Söngleikir eru með vinsælli sviðslistum í dag með yfir hundrað ára sögu og því var löngu tímabært að söngleikjadeild væri stofnuð á Íslandi. Eins og í öðrum deildum er söngleikjadeild með sviðsvana og reynda kennara og er mikil áhersla lögð á að koma fram á sviði.

Námið hentar vel þeim sem vilja undirbúa sig fyrir leiklistar- eða söngleikjanám á Íslandi sem og erlendis. Einnig er það gott fyrir söngvara sem vilja fá meiri reynslu og þjálfun á sviði, losa um líkamann og venja sig af kækjum sem hafa ef til vill orðið til í tímans rás. Hægt er að taka grunn- og miðpróf eins og í einsöngsnámi. Það má segja að söngleikjanám í deildinni brúi bilið milli óperu- og leiklistarnáms annars vegar og námi í hryntónlist hins vegar. Kennd er sviðsframkoma, tónfræði og tónlistarsaga en áhersla lögð á að venjast því að koma fram.

Tilgangur námsins er sem sagt að þjálfa nemendur í leik, söng og hreyfingum á söngleikjasviði. Áhersla er lögð á að hvetja til sjálfstæðra vinnubragða og að byggja upp möppu með lögum sem hægt er að nota við ýmis tækifæri, bæði tónleika og inntökupróf. Leitast verður við að leyfa nemendum að reyna hina ýmsu söngstíla söngleikjanna, finna styrkleika þeirra og þroska sig á ótroðnum slóðum. Hvatt er til frumkvæðis og hópvinnu. Hver nemandi fær sinn einkakennara í söng sem hefur umsjón með framvindu söngnámsins yfir veturinn. Námið er sniðið með það fyrir augum að geta stundað það með vinnu eða skóla en góð mæting og frumkvæði hefur bein áhrif á val í hlutverk í vorsýningu deildarinnar.

Nemendur í grunnnámi

Einn einkatími með kennara á viku (30 mínútur). Einn tveggja tíma hóptími þrisvar sinnum í mánuði með söngkennara og píanóleikara. Klukkustund með píanóleikara (sameiginlegur undirleikstími grunnáms), nemendur skrifa sig á lista á töflu hjá viðkomandi undirleikara í hverri viku. Fjórðu vikuna í hverjum mánuði eru báðar deildir saman í hóptíma (dúettar og fleira) og í öðrum tíma með gestakennara.Tónfræði og önnur skyldufög metin eftir tónfræðimenntun nemanda og ákveðin af skólastjóra við umsókn. Á tónleikum flytja nemendur eitt sólólag og mælt er með öðru lagi sem er samstarfsverkefni (dúett, tríó o.s.frv.) ef slíkt er mögulegt.

Nemendur í miðnámi

Einn einkatími með söngkennara á viku (60 mínútur). Ein klukkustund með píanóleikara (sameiginlegur undirleikstími miðnáms), nemendur skrifa sig á lista á töflu hjá viðkomandi undirleikara í hverri viku. Tveggja tíma hóptími þrisvar í mánuði með söngkennara og píanóleikara. Fjórðu vikuna í hverjum mánuði eru báðar deildir saman í hóptíma (dúettar og fleira) og í öðrum tíma með gestakennara. Tónfræði/tónheyrn og önnur skyldufög sem tilheyra miðnámi.

Á tónleikum flytja nemendur eitt sólólag og mælt er með öðru lagi sem er samstarfsverkefni (dúett, tríó o.s.frv.) eða stutt sólólag. Ef nemandi er ekki með hópverkefni býðst honum til vara að syngja eitt stutt sólólag til viðbótar. Í sérstökum tilfellum (t.d. ef fátt er í miðdeild) er gefið leyfi til að taka annað sólólag þar að auki. Önnur sérstök hópatriði í samráði við kennara.

Almennt um tónleika

Val á lögum er samkvæmt samþykki kennara og síðan skal nemandi skrifa lagaval á þar til gert blað uppi á töflu í skólanum í síðasta lagi viku fyrir tónleika. Tónleikalag telst ekki skráð á nemanda fyrr en þetta hefur verið gert svo það borgar sig að hugsa fram á við og undirbúa sig tímanlega. Nemendur bera ábyrgð á að skila tímanlega inn nótum til píanóleikara á formi sem viðkomandi samþykkir. Best er að skila inn nótum sem hafa bæði hljóma og nótnaútsetningar.

Hóptímar

Hóptímar eru tveir í viku, einn fyrir hvora deild. Þar er unnið með nemendum í sólólögum og hópatriðum (dúettum og upp úr). Þeir eru undir handleiðslu kennara, meðleikara eða annarra þeirra sem deildin kallar til við námið. Ætlast er til þess að nemendur nýti sér sem best tíma með meðleikara til að undirbúa sig fyrir hóptíma ef lögin eru flókin í samspili. Þannig er tryggt að hóptímar séu nýttir til að hjálpa nemendum að bæta sig en ekki til að læra óundirbúin lög. Nemendur sem syngja blaðlaust hafa forgang í hóptíma.

Tími með meðleikara

Nemendur geta bókað sig til að renna lögum með meðleikara. Meðleikari er með vissa klukkutíma á viku á vissum tímum sem tilkynntir eru af skrifstofu og meðleikurunum sjálfum. Tilgangur er undirbúningur undir tónleika og fyrir hóptíma. Nemendur eru hvattir til að nýta sér þessa tíma strax frá byrjun. Aukatímar með meðleikara eru ekki fáanlegir fyrir tónleika heldur er ætlast til þess að nemendur vinni jafnt og skipulega að undirbúningi laga.

Vorsýning

Stærsta verkefni söngleikjadeildar eftir áramót er að setja upp nemendasöngleik með báðum deildum. Prófað verður í hlutverk samkvæmt fyrirmælum kennara þannig að nemendur geta fengið tækifæri til að sanna sig ef hugur stendur til ákveðinna sérstakra hlutverka í söngleiknum. Almenn regla er að nemendur í miðnámi hafa forgang í stærri hlutverk en kennarar geta þó gert undantekningu á því samkvæmt sínu samráði og eftir inntökupróf.

Frumsýningarvika: Mikilvægt er að nemendur séu lausir og í fríi alla frumsýningarvikuna frá vinnu og skóla, ef með þarf.  Mælst er til þess að nemendur sleppi engum hóptíma eftir áramót nema í neyð og skipuleggi utanlandsferðir og önnur frí eftir frumsýningu.

Upptaka

Hljóðritun á söng nemenda er aukaverkefni sem boðið er upp á á hverjum vetri. Tilgangurinn er að bjóða nemendum ódýra leið til þess að öðlast grunnreynslu við hljóðritun á söng sínum ásamt því að eiga upptöku með sér til að eiga eftir veturinn. Hver nemandi fær eina klukkustund þar sem miðað er við hálftíma til upptöku og hálftíma til eftirvinnslu í samráði við upptökumann/kennara. Nemendur skulu finna undirleik á netinu og skila til kennara sem sér um hljóðritun. Afraksturinn fær síðan grunnmeðferð frá fagmanni og nemandi fær tilbúna hljóðritun til eigu eftir veturinn. Niðurgreitt verð fyrir upptökuna er kr. 10.000 og greiðist með skólagjöldum. Umsjón með upptökunum hefur Þór Breiðfjörð.

Próf

Nemendur geta tekið stigspróf í söng og er uppbyggingin svipuð og í óperunámi. Nemandi þarf að teljast tilbúinn í viðkomandi próf en próftaka er alls engin skylda. Stigspróf eru sjaldnast tekin á hverjum vetri. Nemandi þarf að ræða próftökuáhuga við umsjónarkennara sinn með mjög góðum fyrirvara þar sem undirbúningur á efni fyrir prófið tekur tíma.

Um lagaval almennt

Nemendur eru hvattir til sjálfstæðra vinnubragða og til þess að hafa frumkvæði við að finna lög til að syngja. Kennarar leggja til einstök lög ef þeir telja þau henta nemendum eða hjálpa þeim við raddlegan þroska. Nemendur bera ábyrgð á að útvega sér nótur fyrir lög sem þeir velja sér og er mælt með síðum eins og musicnotes.com til þess. Skólinn hefur ákveðið safn af nótum á skrifstofu sem nemendur hafa aðgang að. Sömuleiðis hjálpast nemendur og kennarar að við að byggja upp safn af rafrænum nótur sem báðar deildir hafa aðgang að.

Námið er ekki fullt nám. Nemendur hafa bara einn einkatíma og einn hóptíma í viku fyrir áramót en svo mæta báðar deildir tvisvar í viku í hóptíma eftir áramót (þri/mið) þegar vinna við vorsýningu hefst. Nýtið tímann vel á milli. Lærið lögin ykkar, skilið nótum tímanlega inn til píanóleikara svo þeir hafi tíma til undirbúnings. Ef þið lærið lögin er hægt að leikstýra ykkur og hjálpa frekar í hóptímum; það er undir ykkur komið en nemendur sem syngja utanbókar hafa forgang í hóptímum. Spjallið við félaga ykkar í deildinni og gerið atriði saman; verið frjó og óhrædd. Eitt það skemmtilegasta við leiklistarstarf er hópvinnan, ekki síst samsöngur. Gangi ykkur vel og góða skemmtun.